Rokstu sagataveja: portals lakuga.lv

Da ituo gods 5. maja sevkuram interesentam ir vareiba dasaceit daleibai pyrmajā Latgolys tautys tārpu skatē, kas nūtiks 31. majā Daugovpilī. Tei byus vīna nu Latgolys Dzīduošonys svātku symtgadis nūtikšonu, kuruos mierkis ir veicynuot Latgolys tautystārpu dzeivuotspieju, tūs saglobuošonu, nosuošonys kulturu i veicynuot tūs popularitati myusu dīnuos, viestej organizatoru – bīdreibys “Latgales etnogrāfiskā vēstniecība” i Daugovpiļs Vīneibys noma – sagataveituo informaceja.

Da ituo gods 5. maja sevkurs interesents, kam pyurā ir pylnys komplektacejis Latgolys tautystārps var dasasaceit pyrmajai Latgolys tautystārpu skatei, dasacejuma anketa daīmama ITE. Aizpiļdeitu anketu juosyuta iz e-posta adresi latgale.etno@gmail.com. Papyldu anketai juoīsyuta ari 2–3 lobys kvalitatis fotografejis, kuruos piec vareibys piļneiguok atspīgeļoj tautystārpa kūpskotu i detalis. Teik pījimti kai individuali, tai ari kolektivu dasacejumi.

Latgolys tautystārpu skate nūtiks ituo gods 31. majā Muokslu izgleiteibys kompetenču centrā “Daugovpiļs Dizaina i muokslys vydsškola “Saulis škola”” (Saulis īla 8, Daugovpiļs).

Kotru tautystārpu komplektu viertēs žureja pīcu cylvāku sastuovā, piec itaidu kritereju:

• Tautystārpa atbiļsteiba kulturviesturyskajam nūvodam i konkretajam laika pūsmam (arheologiskais tārps, 19. godu symta suoku, vyds voi beigu pūsmys);
• Tautys tārpa darynuojuma kvalitate – tehniskais izpiļdejums, materialu atbiļsteiba viesturyskajai patīseibai;
• Tautys tārpa kūpskots.

Žureja par kotra kritereja izpiļdi varēs daškiert nu 1 da 10 punktu. Ar vysu skatis nūlykumu var īpasazeit ITE.

Kai stuosta bīdreibys “Latgolys etnografiskuo viestnīceiba” puorstuove Iveta Seimanova, ideja par Latgolys tautystārpu skati rodusēs piec Latvejis tautystārpu skatis “Mēnesnīcā” Vyspuorejūs dzīšmu i deju svātku laikā, kas nūtyka 2023. godā Reigā. Skatē latgalīšu tautys tārpu, saleidzynojūt ar cytim nūvodim, asūt bejs vysmozuok, piec tuo asūt suokts mierktīceigs dorbs – izstruoduots lekceju cyklys par tautystārpa nosuošonys kulturu, sovpus, kab uzrunuot leluokys tautys masys, 2024. godā tyka izveiduots tautystārpu foto projekts “Piecgarša” (vaira par projektu skaiti ITE).

“Mes cīši aicynojam vysus, kam ir Latgolys tautystārps, sabraukt nu maleņu maleņu Daugovys krostūs, sevi paruodeit i cytus apsavērt! Pīsadaleit aicynuoti vysi tautystārpu nosuotuoji, kam ir sovs tautystārps, nu Zīmeļlatgolys da Dīnavydlatgolai. Teik jimti vārā ari senejī etnografiskī rūbeži, tymā storpā ari Sieleja i Krustpiļs, taipoš ari Latgolys tautystārpu nosuotuoji nu puornūvodu i diasporu. Ari niu čakluos meitys vēļ var īspēt nūaust pa bruņčam, izadeit zečis, sapierļuot vaiņuku i stuovēt Latgolys dzīduošonys symtgadis prīškā kai eistynys Muorys zemis meitys,” aicynoj Iveta Seimanova.