Rokstu sagataveja: portals lakuga.lv

Itymā nedeļgolā Upītē nūteik tradicionalais pasuokums “π-dzīdam”, partū kulturys īsacejumus itūreiz īsoka Namaterialuos kulturys montuojuma centra “Upīte” direktors Andris Slišāns. Jis nedeļā pyrma Juoņa dīnys īsoka nūbraukt ekskursejā iz Zīmeļlatgolu!

Viļaka i “Abrinis ustobys”

Saulgrīžus īsoku sagaideit Zīmeļlatgolā. Ruodīs, ka tei ir cīši loba dūma. Suoksim tū apmeklēt nu zīmeļu pusis. Suokumā nūbrauksim iz Viļaku, lai izbaudeitu piļsātys breineigū atmosferu. Nūteikti īsoku pīsasaceit ekskursejai “Abrinis ustobuos”, kur īpasazeisi ar myusu pusis viesturyskajom līceibom. Par “Abrinis ustobom” vaira vari izzynuot ITE.

“π-dzīdam” Upītē

Kod esi apmeklējs “Abrinis ustobys”, tuoļuok brauc iz Upīti. 21. junī tī nūteik taids kai īleiguošonys festivals, kas saucās “π-dzīdam”. Itymā pasuokumā ir savīnuots tradicionalais ar natradicionalū – tī byus kai gunkurs, tai dzīsmis i rūtalis. Taipat pi myusu uzastuos taidys modernuos muzykys grupys kai folklorys kūpa “Upīte”, grupa “Kei-Rei” i “Krēsla”. Tok myusu eipašī gosti byus grupa “Tranzīts” i DJ Šamans nu Līpuojis, kurs kuorteigā indiaņu izskotā izkustynuos vysus eisuokajā vosorys naktī. Vaira informacejis par pasuokumu i beleti ITE.

Nūbraukt gostūs iz Zeļču solu

Apcīmoj Anneli Slišāni i Zeļču solu, kas byus ituo ceļuojuma nūslāguma pītura pi poša rūbeža. Zeļčūs, pasakuopūt iz kaida bluča, variesi redzēt sātu, kas iztaiseita iz poša rūbeža. Variesi apsavērt i dečus, i Annelis izkūptū dabeigūs puču pļovu, ka sarunuosi, variesi nūveit ari kaidu vaiņuku voi mandalu. Vaira par Zeļču solys tekstilmuokslys izstuožu zāli ITE.