15 dzīsmis latgaliski ap zīmu i svātkim

15 dzīsmis latgaliski ap zīmu i svātkim

Rokstu sagataveja: portals lakuga.lv

Latgalīšu kulturys ziņu portals lakuga.lv ar tematiskajom izlasem turpynoj pīvērst viereibu latgalīšu muzykai i tuos byušonai vysaidai. Svātku laikā pīduovojam nūsaklauseit svātku i zīmys tematikai veļteitūs dzīšmu izlasi, kurā kai i īprīšk – kai jaunuokys, tai i senejuokys vysaižu žanru i izpiļdeituoju dzīsmis.

Ar īprīškejom portala sagataveitajom izlasem var īpasazeit ite:

1. Jōra – Atīdami Zīmyssvātki

Grupys “Jōra” dzīsme “Atīdami Zīmyssvātki” nu 2020. godā izdūtuo mini albuma “Atīdami”.

2. The Sound Poets – Tik lānai kai munys dūmys

Uģa Vilcāna dzīsme “Tik lānai kai munys dūmys” grupys “The Sound Poets” versejā.

3. Grodi – Kačīšami bārns nūmyra

Folklorys kūpys “Grodi” dzīsme “Kačīšami bārns nūmyra” nu 2023. godā izdūtuos kulturys i muokslys centra “Ritums” dzīšmu izlasis “Devums”.

4. Grupa “Juuk” i Harijs Ločmelis – Ak, nuoc, Emanuel

2022. gods golā īraksteita i publicāta grupys “Juuk” i grupys “Aston Kais” dzīduotuoja Harija Ločmeļa kristeiguo adventa laika dzīsme “Ak, nuoc, Emanuel” kai veļtejums mīram i aicynuojums atbaļsteit Ukrainys ceiņu par uzvaru.

5. Ilža – Lauzit skolus, pyutit guni

Cyblys folklorys kūpys “Ilža” Zīmyssvātku laika dzīsme “Lauzit skolus, pyutit guni” nu 2011. godā izdūtuo albuma “Rūtoj, kaladoj”.

6. Knifs – Zīmā

Sovulaik aktivys vokaluos grupys “Knifs” dzīsme “Zīmā”.

7. Laimas Muzykanti – Kaladū

Folklora grupys “Laimas Muzykanti” dzīsme “Kaladū” nu grupys 2003. godā izdūtuo albuma “Gonam gona”.

8. Fak’n’turīs – Myužeigs skaistums

Grupys “Fak’n’turīs” svātku sveicīņs ar dzīsmis, kurys vuordu autore ir Pluociņu Mase (Plōciņu Mase). Dzīsmis skice sovulaik rodusīs Latvejis Radejis Latgolys studejis raidīrokstā “Puslopys”. Grupa par dzīsmi soka: “Senejim i na cik senejim latgalīšim beja parodums ap svātku laiku nūkaut cyuku i taiseit vysaidus gakis iedīņus. Latgalīši taidu pasuokumu sauce par abādu. Par svātkim, cyukys gali i abādu ari ir grupys dzīsme!”

9. Dainis Skutelis – Bryunaceite

Tāļa Masīsa dzīsme ar Juoņa Klīdzieja vuordim “Bryunaceite”, kurei pyrmū reizi izskanēja sovulaik radejis īstuiejumā “Benedikta armoņika”. Vaira par dzīsmi var izzynuot ITE.

10. Etno kompaneja “Zeidi” – Zīmassvātki sabraukuši

Etno kompanejis “Zeidi” (Reiga) dzīduotuo dzīsme “Zīmassvātki sabraukuši” aba “Puišim dasu nadūsim”, kas pīraksteita Ludzys nūvoda (sovulaik Kuorsovys rajona) Mežavydūs.

11. Borowa Mc – Decembrī

Dzīsme nu grupys “Borowa Mc” 2008. godā izdūtuo albuma “Ui, lobs”.

12. Unknown Artist – Pa-pavedi

Dzīsme “Pa-pavedi” nu grupys “Unknown Artist” 2020. godā izdūtuo debejis albuma “New Folder”.

13. Yann & Latgalians – Svātku kačs

Sovulaiks pankroka grupai, kurā beja apsavīnuojs fraņcūzs i latgalīši, beja tradiceja iz kotrim Zīmyssvātkim izdūt kaidu jaunu dzīsmi. “Svātku kačs” ir vīna nu taidu eksperimentu.

14. Rēzeknis nūvoda vokaluo studeja “Skonai” – Sveceitis dzīsmeite

Dzīsme nu vokaluos studejis “Skonai” albuma “Rūtaļa”, kas izdūts 2017. godā. Dzīsme ar Ontona Slišāna vuordim.

15. Bez PVN – Jauni mes

Dzīsme nu grupys jaunuokuo albuma “Paraleli horizonti”. Tuos autors Kristaps Rasims par dzīsmi sacejs: “Zīmys saulgrīžu laikā myusu seņči guoja čyguonūs (aba kekatuos, budeļūs). Cīši svareigs tāls itam ritualam beja “nuove”. Ļauds ticēja, ka tuos sātys, kuruos nuove jau ir pabejuse, tyvuokuo gods laikā tei vaira naīs gostūs. Čyguonu maskys i tāli beja dažaidi, bet jūs kūpeiguo miseja beja ar izskotu, dzīsmem i daņčim aizdzeit paceli vysus ļaunūs gorus i ticēt, ka vyss byus labi! Itys ir pīruodejums tam, ka myusu ļauds jau seņ ir saprotuši, ka lai voi kaids liktiņs ir atvalāts – juojem tys sovuos rūkuos i juoizavielej – dzeivoj laimeigs voi dzen sevi kopā. I vysam puori – itei vysod ir bejuse tymsys i gaismys ceiņa, kurā gaismai vysod ir juouzvar. Kab tai i byutu – lai tymsa nūdiļst i atīt gaisma! I kab ļauds, kas ir obejuos upis moluos sasateik, verās i redz, klausās i dzierd, i smejās kūpā!”


Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]