Rokstu sagataveja: portals lakuga.lv

Folklorys kūpa “Upīte” turpynoj dorbu pi dzīšmu cykla, kas veļteits vysam godam i tuo ritiejumam. Pavasarī i vosorā īdzīduotuos dzīsmis niu papyldynoj jaunuokais cykla dorbs – “Rudens bolss”, kas da šam nav bejs folklorys kūpys repertuarā. Dalinīki gatavejās folklorys festivalam Kostarikā, aicynoj iz “Gūdim” i plānoj tradicionalū simpozeju cyta gods februarī.

Dzīsme “Rudens bolss” ir skaņdorbs, kū nūvodpietnīks, folklorists i dzejnīks Ontons Slišāns 1972. godā īraksteja pi Upītis kulturtelpys teiciejis Annys Slišānis (1922–1977). Tei ir vīna nu daudzu dzīšmu, kū Ontons Slišāns ir savuocs i īmyužynuojs lentēs, taidā veidā saglobojūt vītejū dzīduošonys tradiceju i ari volūdys skaniejumu. Folklorys kūpa “Upīte” niu turpynoj itū dorbu, atdzeivynojūt senejūs bolsus jaunā skaniejumā i turpynojūt stuostu par dzeivi i dzīsmi Upītē.  

Dzīsme turpynoj folklorys kūpys “Upīte” īceri goda laikā izdzīduot vysu goda ritiejumu, savejūt senejis melodejis ar myusdīneigu skaniejumu. Tei īraksteita “Bigmar’s Records” īrokstu studejā Upītē. Kūpys vadeituojs Andris Slišāns stuosta: “Itūreiz nav spāka taiseit videoklipus, bet taisom tuodu dzīšmu cyklu. Īsuokom pavasarī ar Leldīnis dzīsmi, tod turpynuojom ar vosorys dzīsmi “Gonu reps”. Piečuok vysys dzīsmis saliksim digitalā albumā.” Portals lakuga.lv viesteja, ka itymā rudinī folklorys kūpa izdeve dzīsmi “Gonu reps”, kura īkļauta ari jaunuokajā etnomuzykys izlasē “Sviests 11”. 

Vaicuots, kaidi vēļ folklorys kūpai “Upīte” ir tyvuokī plani bez dzīšmu īraksteišonys, Andris stuosta: “Mums ir daudz plānu, tyvuokais nu tūs iz reizis piec vaļsts svātku – dūsimēs iz folklorys festivalu Kostarikā. Piec tam aicynojam vysus ari iz Upītis kulturtelpu i namaterialuo montuojuma svātkim “Gūdi”, kas itūgod nūtiks 6. decembrī. Tī varēs dzierdēt ari kaidu nu myusu goda ritiejuma projekta dzīšmu.”

Taipat nūteik gataveišonuos folklorys simpozejam, kas nūteik jau vairuokus godus – itūreiz 2026. gods februarī, i tys tiks veļteits Zīmeļlatgolys muzykantim, eipaši izceļūt daņčus i zaļumballis. Īprīšk simpozeji, kas nūteik sadarbeibā ar Latvejis Nacionalū kulturys centru, Jāzepa Vītuola Latvejis Muzykys akademeju i Latgolys Muzykys i muokslys vydsškolys Tradicionaluos muzykys nūdaļu, tykuši veļteiti senejom goreigajom dzīsmem, saļmu dzīduošonys tradicejai i Zīmeļlatgolys muzykantu apzynuošonai. Simpozejūs nūteik kai lauka pietejumi, tai teoretiskuos i praktiskuos nūdarbeibys.