Rokstu sagataveja: portals lakuga.lv

Kai īrosts, portals lakuga.lv pīduovoj jaunuokuos latgaliski publicātuos muzykys apkūpuojumu ar dzīsmem, kurom nav atsevišku videoklipu voi latgalīšu volūda ir tik daļa nu vysys dzīsmis. Itūreiz saīt apkūpuojums ap pavasara – apreļa i maja pyrmuos dalis – latgaliskajim muzykys jaunumim ar muzika Alda Kisis, grupys “Muosys”, apvīneibys ”Vētra KRŪ” i cytim skaņdorbim, nūtikšonom i sasnāgumim.

Izdavums “Daņču romancis“

Leidza ar pavasari bīdreiba “Danču krātuve”, sasadorbojūt ar kapelys “Karikste” muzykantim i folklorys kūpys “Upīte” muzykantim izdavuse dzejis i tekstu gruomotu “Danču romances”, kurū papyldynoj muzykys albums “Nenosūtītās vēstules”. Albumā ir kai romantiska skaņdorbu izlase, kurā sasavyn plota izjiutu gama – nu gaišys pavasara prīcys da skumis pylnom skaņom. Albumā ir 23 skaņdorbi, bet latgaliski sovu verseju folklorys kūpys “Upīte” muzykanti radejuši četrom romancem: “Upītes molā”, “Pučīte pa dambi”, “Cigars” i “Deļ kam”. Kai portalam lakuga.lv stuosteja kūpys puorstuovs Andris Slišāns, tod itaidu vareibu – īspieļuot dažys romaņcis – kapelai pīduovuojs bīdreibys “Danču krātuve” vadeituojs Sandis Zučiks. “Jis atsyuteja vysu romanču īrokstus, taidys demo versejis i mes dreikstiejom izalaseit treis da četrys romancis, kurys mes gribim. Izalasejom tuos, kurys mums cīši patyka. Kate i Domeniks suoce dūmuot apdaris, i vīnā šaļtī Kate soka, ka varbyut juos varātu skanēt latgaliski. Zvanejom Sandim vaicuot, i jis soka, ka tai jis i beja dūmuojs. Koč nu suokuma nabejom runuojuši, bet i jis tai par reizi beja īsadūmuojs, ka myusu spālātajom romancem vajag skanēt latgaliski. Asūšūs romanču vuordus tod jau Kate puorlyka latgaliski,” stuosta Andris. Albuma gola versejā “Upītis” romancis latgaliski ir kai papyldynuojuma daļa vysam izdavuma stuostam. Videoklipu vīnai nu romanču “Upītes molā” i vysus četrus īrokstus ari kai sovu mini albumu (EP) “Upīte” īspieja izdūt jau februara vydā. Vaira ITE.

Aldis Kise – Pi sābrim munim

Klauseituojim viestejūt, ka aizsuokts dorbs pi vinila platis, kurā byus juo koncertprogramys “Mūžu izdziedāt…” dzīsmis akustiskā (akordeons i bolss) skaniejumā, muziks Aldis Kise publicējs pyrmū skaņdorbu – sovu autordzīsmi “Pi sābrim munim”. Dzīsme sovulaik, pyrma desmit godu, izdūta ari grupys “Baltie lāči” albumā “Ar draugiem”, bet niu īrokstu studejā pi producenta Kaspara Maka dabuojuse jauna skaniejuma.

VIŅA, Krisy, Revolūcija un ŪGA – Vētra KRŪ (Straume’26)

Jau viestejom, ka, gaidūt hiphopa festivalu “Straume”, kas itūgod jau pīktū godu 3. i 4. julī byus “Zeit” rodūšajā kvartalā Cāsu nūvoda Leigatnē, četrys hiphopa muokslineicys apsavīnuojušys projektā “Vētra KRŪ” i ar eipašu prīšknasumu izastuos festivalā. Sūpluok ar reperem Viņa, Krisy, Revolūcija projektā pīsadola ari latgalīšu hiphopa muokslineica Ūga. Apreļa vydā jaunuo apvīneiba publiciejuse pyrmū singlu “Vētra KRŪ (Straume ’26), kas radeits sadarbeibā ar reperi Gustavo. Dzīsmei radeits ari videoklips, kas sataiseits liminalūs ci taidu kai nu vīna stuovūkļa ūtrā puorīšonys ustobu estetikā (angļu volūdā termins – liminal space). Klipa režisore ir Elza Dandzberga i jei skaidroj, ka taida byušona fiziskā “na ite i na tī” vidē palīk ari par īškejū stuovūkli, kas ļaun dūmuot i dareit jaunā veidā. Dzīsmis bīta autors i producents Gustavo sacejs, ka, veidojūt dorbu, gribiejs izceļt kotrys solistis izpiļdejuma maneri i styla niansis, deļtuo aranžeja saguojuse boguoteigi dinamiska, i skaņdorbs golā apvīnojūt četrys atškireigys individualitatis i nūskanis.

Muosys – Muote dieleņu auklēja

Pošā apreļa golā jaunu skaņdorbu – dzīsmis “Muote dieleņu auklēja” verseju sovā aranžejā – publicējuse grupa “Muosys”. Dzīsme īraksteita studejā “Lauska”, bet pi aranžejis struoduojušys vysys grupys dalineicys – Liene Brence (vejūle, bolss), Laima Maslova (flauta, bungys, bolss), Marta Šegina (gitara, bolss).

Šova “Pārdziedi mani!” dalinīki – Pie dieviņa gari galdi

Svietejūt Latvejis Republikys Naatkareibys atjaunuošonys dīnu Latvejis Sabīdryskuo medeja muzykali izklaidejūšuo šova “Pārdziedi mani!” dalinīki, etnogrupa “Ogas” i Reigys Dūma kora školys gospeļu kors apsavīnuojuši kūpeigā dzīsmē “Pie dieviņa gari galdi”. Dzīsmis aranžeju taisejs Artūrs Uškāns, bet īrokstā pīsadalejuši šova dalinīki: Aija Andrejeva, Andris Baltacis, Juris Kaukulis, Brigita Reisone, Maksims Busels, Asnate Rancāne, Ieva Akuratere, Antra Stafecka, Emilija, Ralfs Eilands, Artūrs Uškāns, Jānis Apeinis, Raimonda Vazdika, Alise Haijima. Vīns nu dzīsmis paņteņu izskaņ i latgaliski, jū dzīd Andris Baltacis, Asnate Rancāne i Artūrs Uškāns. Dzīsmis videoklipa režisore ir Liene Eicēna.

Preiļu purpura kors – Bara bada bastu

Tikū, 10. maja vokorā, TV3 šova “Koru kari” pīktajā sezonā uzvarātuoja gūdu dabuoja Preiļu purpura kors dzīduotuoja Daiņa Skuteļa vadeibā. Šova laikā Preiļu purpura kors, kurs baudeja cīši lelu skateituoju atbolstu, vairuokys reizis dzīduoja ari latgaliski. Vīna nu dzīšmu, kurā īskanēja latgalīšu volūda, beja šova raidejumā, kas veļteits pasauļa hitim, skaniejušuo apvīneibys “KAJ” dzīsme “Bara bada bastu” – jei dabuoja nūslāguma paņteņu ari latgaliski. Atguodynuosim, ka “KAJ” ir Suomejis zvīdru grupa, kas pārņ Zvīdreju puorstuovēja Eirovizejis dzīšmu konkursā i dabuoja tī 4. vītu. Dzīsmis verseju šovā “Koru kari” kai solists izpiļdeja dzīduotuojs, grupys “Latgales klezmeri” dalinīks Imants Spīčs. Dzīsmis “Bara bada bastu” verseju ar latgaliskū pīdzīduojumu var nūsaklauseit ITE, bet portala lakuga.lv interveju ar Daini šaļteņu pyrma šova nūslāguma var puorskaiteit ITE.

Līpnys kuozu bolsa bolva storptautyskā tautys muzykys īrokstu konkursā

Apreļa vydā prīceigys viests sajimtys nu Slovakejis, kur Bratislavā, Slovakejis Televizejis i radejis sātā, nūtykuse 12. storptautyskuo tautys muzykys īrokstu konkursa “Svetozára Stračinu Grand Prix” apbolvuošonys ceremoneja. Konkursa, kas veļteits taišni tautys muzykys – autentiskuos i aranžātuos īrokstim – bolvu par lobuokū autentiskuos muzykys īrokstu sajēme Latvejis Radeja par grupys “Bille” izpiļdeituos dzīsmis – Līpnya kuozu bolsa – “Veretīsi, raugetīsi” īrokstu. Dzīsme īraksteita Latvejis Radejis 1. studejā 2025. gods junī koncertprogramā “Tautasdziesma”, īskandynojūt Storptautyskū folklorys festivalu “Baltica 2025”. Programā “Tautasdziesma” dzīduoja i muzicēja Liene Skrebinska, Anna Patrīcija Karele, Katrīna Karele, Anta Pukīte (Puķīte) i Vija Moore. Programys īrokstu var nūsaklauseit ite, bet dzīsme “Veretīsi, raugetīsi” skaņ nu 51. minuta.

Cyti pavasara muzykys jaunumi, ap kurim portals lakuga.lv jau viestejs:

• Grupai “Dabasu Durovys” jauna dzīsme “Alkimeja”;
• Sovvaļnīks pīduovoj klauseituojim dzīsmi “Marejis teirums” i izsludynoj koncertu “Gorā”;
• Storpkulturu projekta “EtnoZoom” jaunajā muzykys video sasavyn latgalīšu i azerbaidžaņu dzīsmis;
• Pavasara atīšona, “Cylvāka bārna” motivi i cytys jaunuokuos muzykys viests;
• Kai “Rupuči” sasatyka ar Sunānu ci septeni jauni skaņdorbi nu bārnu izruodis “Sunāns!”;
• “Sudobrā” – muzykals paaudžu stuosts latgaliski;