Rokstu sagataveja: portals lakuga.lv

Itūgod tai eistyn navar saprast, kod juosaprīcoj par lelū pavasara atīšonu, kam gryuts saprast, voi zīma moz beja. Bet leidza ar apreļa suokom latgalīšu kulturys ziņu portala lakuga.lv skaiteituojim pīduovojam desmit dzīšmu izlasi, kurā viesteits ap pavasari i nūtikšonom jimā. Dzīšmu sarokstā grupu “Tautumeitas”, “Rikši”, “Dabasu Durovys”, “Borowa Mc” i cytu izpiļdeituoju skaņdorbi. Skaidrys ir vīns, ka nu tautysdzīšmu muzikim cīši meila melodeja ir “Pavasara bolss”, kas izlasē izskaņ vairuokuos variacejuos.

1. Grupa “Tautumeitas” – “Pavasara bolss”

Dzīsme nu grupys 2020. gods suokuos izdūtuo albuma “Dziesmas no Aulejas”.

2. Grupa “Dabasu Durovys” – “Pavasars”

Dzīsme nu grupys “Dabasu Durovys” 2024. gods pavasarī izguojušuo albuma “Dīnys i nadīnys”.

3. Postfolklorys grupa “Rikši” – “Pavasars”

Dzīsme nu 2014. godā izdūtuo grupys debejis albuma “Pa pyrmam”.

4. Biruta Uozuoliņa (Ozoliņa) i etnodžeza apvīneiba “Patina” – “Pavasara bolss”

Dzīsme nu 2006. godā izdūtuo albuma.

5. Tradicionaluos dzīduošonys grupa “Saucējas” – “Kiukoj, uoru dzagiuzeite”

Tradicionaluos dzīduošonys grupa “Saucējas” 2023. gods golā publicēja videoklipu dzīsmei “Kiukoj, uoru dzagiuzeite”. Dzīsme ir pavasara i vosorys breivdobys dzīduošonai rakstureiga dzīsme. Tū “Saucējas” atrodušys Latvīšu folklorys kruotivis digitalajā arhivā – dzīsme pīraksteita 1958. godā nu Kuorsovys piļsātys etnografiskuo ansambļa. Audio formatā “Saucēju” dzīduojumā tei publicāta 2021. godā izdūtajā albumā “Dabā”, tei dzīduota īrokstu sesejā Sāvienys piļskolnā. 

6. Aņss Ataols Bierzeņš – “Pasaver”

Dzīsme nu 2015. godā izdūtuo albuma “Pasaver”, bet videoklips publicāts 2023. godā. Dzīsmē stuosteits ap vierteibom, kurys bārnam dūd i dzymdynuotuoji, i apleicejī ļauds. Jū varātumem saukt par pavuiceibu dālim īsavērt i mīļuot pasauli. Deļtam klipā nūsajāmuši i vysi treis Aņša dāli – Mikeļs, Izidors i Onupris.

7. Grupa “Kaligo” – “Pavasaris”

Dzīsme nu 2024. gods rudinī izguojušuo grupys “Kaligo” albuma “Pirmais pērkons”.

8. Grupa “Borowa Mc” i Juris Kaukulis – “Pavasars”

Dzīsme nu grupys “Borowa Mc” 2008. godā izdūtuo albuma “Ui, lobs!”, īraksteita kūpā ar grupu “Dzelzs vilks” i “Jauno Jāņu orķestris” solistu Juri Kaukuli. Videoklips sovulaik taiseits kūpā ar animacejis muokslinīku, tuo laika Latvejis Muokslys akademejis studentu Jāni Opulu.

9. Aija Eriņa – “Vysa pyrma”

Dzīsme “Vysa pyrma” izdūta 2012. gods vosorā, dzīsmis verseja rodusēs cīšā Aijis sadarbeibā ar skonu meistaru Gintu Solu. Instrumentus īspieļuojs i dzīsmis aranžeju taisejs Gints Sola. Aija poša ir pavasarī dzymuse dzīduotuoja – itūgod svieteitu opolu dzimšonys dīnu, bet dīvamžāļ 2017. godā cīši par agri aizsaukta myužeibā.

10. Grupa “Rupuči” – “Pavasaris”

Grupys “Rupuči” dzīsme, kas topuse speciali latgalīšu volūdys nūdarbeibai “Lels, lels okeans”. Dzīsmis muzykys autors ir Kristaps Rasims, bet teksts nu Ilzis Spergys bārnu dzejūļu.