Izvadumā pīsadaleis Reigys kulturys i tautys muokslys centra „Mazā ģilde” deju ansamblis „Daiļrade” (vad. Iveta Pētersone-Lazdāne), Daugovpiļs Vīneibys noma Latvīšu i latgalīšu kulturys centra deju ansamblis „Laismeņa” i videjuos paaudzis deju kolektivs „Laismeņa” (vad. Diāna Soldāne), bārnu deju kolektivs „Pienupīte” (vad. Inga Pīnupe) i Leigatnis Kulturys noma videjuos paaudzis deju kolektivs „Zeperi” (vad. Patrīcija Zemniece).

Koncertizvadums „Dūd rūku, mameņ!” ir stuosts par jaunys meitys tikšonu sīvys gūdā, šaļti, kod juosadūd paceli nu dzymtuos sātys, pyrmū īpasazeišonu ar jaunū saimi, muosys i bruoļa attīceibom i vīnu nu svareiguokūs nūtikšonu dzeivē – vedeibom. Izvaduma golvonuo varūne ir īsleiguse sovā pasaulī, dūmojūt par sevi i taurinim vādarā, damierst svareiguokū dzeivis vierteibu i spāku – saimi. Juos saruna ar muoti ļaun sajust mīlesteibu i saimis atbolstu, kas otkon mameņai līk atmiņā ataust dzeivis nūtikšonai, kuru jei grib pastuosteit sovai meitai pyrma jaunuo dzeivis pūsma.

Beleti: Daugovpiļs Kulturys piļs kasē (dorba dīnuos 16.00-19.00 i 3 stuņdis pyrma koncerta) i “Biļešu paradīzes” kasēs. Cena: 3,00 eiro.

Deju koncertizvadums „Dūd rūku, mameņ!” ir Jāzepa Vītuola Latvejis Muzykys akademejis 4. kursa bakalaurantis Patrīcijis Zemniecis diplomdorba eksamens. Koncerta kolektivi nav izalaseiti najauši, jo Patrīcijis dejis ceļš cīši sasaviņs ar vysim koncertā īsaisteitajim kolektivim: sovys deju gaitas jei ir aizsuokuse Daugovpilī, bārnu deju kolektivā „Pienupīte”, piečuok tuos turpynuojuse deju ansamblī „Laismeņa”, bet itūšaļt doncoj vīnā nu Latvejis vodūšūs kolektivu – deju ansamblī „Daiļrade”. Paraleli studejom Patrīcija struodoj ari par deju kolektiva „Dzērvenīte” pedagogu i Leigatnis videjuos paaudzis deju kolektiva „Zeperi” vadeituoju.